Талдықорған қаласында 1200 орындық жаңа мектеп құрылысы жобасына оң қорытынды берілді

«Мемсараптама» РМК «Жетісу облысы Талдықорған қаласында 1200 орындық жаңа мектеп салу» жобасына оң қорытынды берілгенін хабарлайды.
Мектеп ғимараты ішкі ауласы бар шаршы пішінде жобаланған, бұл табиғи жарықтың түсуіне және кеңістікті тиімді ұйымдастыруға мүмкіндік береді. Еденаралық байланыс үшін 5 баспалдақ және лифт қарастырылған, сондай-ақ қауіпсіздікті қамтамасыз ету мақсатында ғимарат 2 өртке қарсы бөлікке бөлінген.
Жас ерекшелігі бойынша оқушыларды бөлу мақсатында мектеп үш функционалды аймаққа бөлінген, әрқайсысының жеке кіреберісі мен вестибюлі бар:
• Мектепке дейінгі даярлық,
• Бастауыш мектеп,
• Жоғары мектеп.
1-қабатта: спортзал, асхана, шеберханалар, әкімшілік бөлмелер, мектепке дейінгі даярлық және 1-сынып кабинеттері, БӘД (Бастапқы әскери дайындық) кабинеті, сондай-ақ химия пәні бойынша мамандандырылған кабинеттер блогы орналасқан.
2-қабатта: акт залы, жоғары және бастауыш мектеп мұғалімдер бөлмелері, 2–4-сынып кабинеттері, 5–11 сыныптарға арналған оқу кабинеттері, биология пәніне арналған мамандандырылған кабинеттер блогы және хореография кабинеті бар.
3-қабатта: 5–11 сыныптарға арналған оқу кабинеттері, кітапхана, физика пәні бойынша екі мамандандырылған кабинет блогы және бастауыш мектепке сабақ өткізуге мүмкіндік беретін әмбебап зал қарастырылған.
Тапсырыс беруші: «Жетісу облыстық құрылыс басқармасы» ММ.
Бас жобалаушы: «JeR Group» ЖШС.